Schnitzelbank 2010

De Schutzwall vo de Innerschwyz  

 isch z’Knonau dure broche

D’Zürcher chönd jetzt eins, zwei, drü  

 i üsi Gägend bloche

Alli wänd e Wohnig ha                                        

am schöne Zugersee

Und mier chönd schnell - is Niederdorf                      

go blutti Wyber gseh.

D’Nati gaht uf Afrika                                             

Othmar Hitzfeld sei Dank

Was dett passiert - mier wüssed’s ja              

es macht üs jetzt scho chrank

D’Panini-Bildli sind scho druckt                        

oh chönnt mer doch herjee

Statt die vo ü - sem Nati-Team                          

d’ U 17 Grinde gseh.

Für’s Eidgenösisch Schwingfäscht z’Baar     

isch jetzt als in Butter

D’Tangänte und s’verschandlet Land             

sind als Fäschtplatz supper

Für d’Sagmählring  - heds Kreisel gnueg      

d’Tribüni chunnt uf d’Strass

De Tunel dient  - als Unterkunft                        

für d’VIP - jetzt gämmer Gas.

Ohni Chärtli gaht nü meh                                   

bi Poscht - Bahn oder Bank

Au Supercard und Cumulus                              

han i Gott sei Dank

Für jede Schiisdräck bruchts e Card               

das gid mer nu de Boge

Am Ändi wird - au no bim Sex                            

e Chart dur’s Schlitzli zoge. 

Jetzt wird denn üsers Land ufteilt                                 

s’cha jede e chli ha

Frankrich, Dütschland, Öschterich                   

und au Italia

De Ghaddaffi wott’s eso                                     

är güsst Öl is Füür

De Ruedi Merz - seit T’schuldigung                 

ich cha doch nüt defür.

D’Fäschtifitäte nänd in Baar                              

eifach e keis Änd

Chum hend d’Schwinger d’Hose glüpft                      

wird g’jodlet liberamänd

Uf de Gmeind hend’s äntli Büez                       

wer söll wo grilliere

Und jede Gmeind - rat darf emal                                  

als OK Chef brilliere.

S’Tandor heisst jetzt Happyness                                 

Pizza gid’s im Dieci

Im Ruan Siam Diamond  - und Kebab            

seid der keine Grüezi

Kei Stammtisch und kei Raucherbeiz             

zum Jasse hesch kei Wahl

D’Beize stär - bed nimsch zum Schluss                     

im Landhuus s’Liichemahl.

10 mal Präsi - 8 mal Vize                                    

isch die letscht Bilanz

vo vore hinde sitlich und                                     

als Portrait oder ganz

s’isch es Ränne Kopf a Kopf                             

de Päuli finds zum Chotze

jetzt tued de An - di meh als ich                        

us de Ziitig glotze.

Vom Lakai zum Räbevatter                                

hed’s de Martin bracht

und im Militär hed är                                            

Karriere gmacht     

Nur Major wott är nid si                                        

susch würd er am Änd    

Vo de Solda - te wo stramm stönd                   

Herr Majo-Neese gnännt.

Hesch de Biometrisch Pass                             

chasch is Usland gah

Muesch de halt  - bim Scänere                         

d’Hose n’abe lah

Eine hend’s verhaftet druf                                              

s’isch ja so vermässe

De hed doch nur - es Hackle feucht                 

im Füdlispalt vergässe.

Im Gschäft gaht gar nüt ohni mich                   

die wäred hilflos gänzli

D’Schweinegrippe bruch i nid                           

will keis gringleds Schwänzli.

Ha mi denn  grad impfe lah                               

ha gmeint das nützi doch

Jetzt han i d’Vo - gelgripp becho                        

und pfiff us em letschte Loch.

Es bruucht jetzt keini Sitzige meh                                 

und au kei Konferänz

S’gaht alles vo deheime n’us                            

de Lipp chunnt nümm i’d Chränz

D’ Gmeindröt händ es Ei-phon kauft               

au de Arnold Joscht

Nur bedie - ne chönnt sis nid                            

em Walti isch’s e Troscht.

Mier sind kei Zuger - mier sind Baarer            

s’isch immer e so gsi.

Tönt’s vom Arbach bis Inwil                               

nur d’Zuger gsehnd’s nid i

Dem setzt de Tännler jetzt es Änd                    

und bauet churzerhand

Zum Anektie - re vo Inwil                                     

d’Tangänte quär durs Land

Z’Bärn hed’s keini Manne meh                         

nur no Fraue Power

D’Erika s’Dorli - und d’ Pascale                        

sind halt alli schlauer

Au dehei hed d’Hosen a                                     

üses wiiblich Gschlächt

Mier Trottle sind - jetzt nume nu                        

zum Strassefäge rächt.

De Päuli hed e dumme Stei                              

mues ne lüfte lah

Sitzt ufs Bänkli näbem Teich                             

und luegt es Büechli a

De Kopf sinkt tüüfer – d’Doris gseht                

wie n’är Grinds vora

Im Teich d’Zunftmei – schter Ketti suecht       

wo ner hed ligge la.


Bänke : Annelies Stebler     -   Helgen : Brigitte Andermatt