De Uster Chnuuspi de bin ich,
als Kommunist bekannt
Bi früener s’linggischt Bürtschli gsi,
jetzt bin i anerchannt
als Connaisseur und Villä Bsitzer,
wirk ich fascht scho bieder
jetzt frag ich dich, Genosse Lang,
wenn wirsch au du bald gschieder?
Alls wird breiter, höcher, grösser
jede will chli meh
Chasch’s bi de Strasse, Hüser und Monumänte gseh
bim Gotthardtunnel isch’s au so
da mach i jedi Wett
em Leuebärger gaht’s nur drum
wer de Längschti het.
D’Füürwehrmanne sind entdüscht
ihre schönschti Maa
De Langenegger Päuli hed’ s
im Rägen’uss la stah
Jetzt hend’s uf geili Nachfolg ghofft
oooh wär das doch heiter
Viel lieber als de Kari B.
hätteds s’Berti Zeiter.
D’Fraue Mehrheit im Bundesrat,
für d’Manne nüüd zum Lache
Drum lahts de Ruedi Merz ämal,
im Parlament la krache
Bübüü - bübüü - bü Bünderfleisch,
fibriert am ganze Rumpf
Und dänkt debi a’d Oberschenkel,
vo de Widmer-Schlumpf
I de Disco döfsch nüm rauche,
uf behördlichs G’heiss
sit do stinkt’s dinne mörderisch,
nach Fürz und Achselschweiss
S’nützt alles nüd, kei Deostick,
und au kei Luftmaschine
Drum git’s nur eis, de Ruef nach use:
„Raucher - chömed ine“
Ine use, use ine
s’Wunschkonzärt isch da
De Alt wott wieder, de Jung wott nümm
beid tönd sich wähle lah
Und d’Betschert Buebe wärdet gwählt
d’SVP cha juble
Mer hend’s verwütscht, die Wähler sind
doch alles nume Tuble.
De European Songkontescht,
isch für d’Schwiiz ä Jammer
De von der Heide und Bobo,
beidi ä kei Hammer
De eini schwul, dä ander wüescht,
so holt mer doch kei Boni
drum schicked wieder s’Francine Jordi
aber dää mal oben ohni.
Google, sörfe, twittere
mit de Wält verbunde
bim tschätte, skype, doodle hesch
e hufe Fründe gfunde
gisch dis ganze Läbe pris
hesch plötzli Luscht zum schmuuse
trotz Facebook oder Fudibook
muesch elei go pfuuse.
Immobiliemakler und Bauchef
isch e klevre Deal
Weisch genau was, wenn und wo
vo wem und au wieviel
Fürs Eidgenössisch Schwingerfäscht
mischlisch s’isch üs klar
Doch Paul bisch nid de Blatter Sepp
und Baar isch nid Katar.
S’ mues wieder Zucht und Ohrnig hi
seid d’Volkspartei und will
Zrugg zur Tatze i de Schuel
und zum alte Drill
Früefranzösisch und Hauchdeutsch
sind total verchert
Will de Goof bim sändele
scho jugotürkisch lehrt.
De Berlusconi z’Italia,
isch ä rächte Grüsel
bürschtet jungi Meitschi, nur
leider nid de Güsel
D’Italiäner wend en nüm
mier chönd en billig näh
Als Quäristiiger i de Schuel
chan er Sexualkund gäh.
Z’Inwil isch s’Schuelhuus renoviert
debi isch vil falsch gloffe
Wenns schneit müends sofort d'Stäge speere
susch gits e Kathastrophe
D’Veloständer bunkersicher
mit Beton überdeckt
Stönd total am falschen Ort
s’gfallt nur em Architekt.
Bänke : Annelies Stebler - Helgen : Brigitte Andermatt