Z'Baar isch Littering - es Problem
's heig sich gschteigeret - ganz extrem
nid alls isch Güsel - würkli wahr
's meischte isch - «Skulptur in Baar»!
D’Polizei - macht grossi Auge
e blutti Frau - s' isch nid zum glaube
"Tschuldigung" - seit die bigott
"ich bi gäg's - Verhülligsverbot"
Pudel - Spaniel - Appizäller
chömed z’Baar - jetzt uf de Täller
d’Hundehaltig isch vill z’tüür
wäg de gmeindliche - Hundestüür
De Kalamba haut’s – uf Afrika
drum isch für Hochzyte – niemer meh da
Beärdigunge – chasch nümme bueche
im Landhuus isch – finito Chäs-Chueche
Tomik – Feuchter - Hotz – heissed die Alte
Wismer – Utiger - Steime – chan i bhalte
Aber de Neu – wie heisst au dee?
CoCo - CoCo - Cosandee !
Eis zu zwölf – gilt jetz z Baar
au im Gmeindrat – würkli wahr
jede suufd – das säg ich dieer
i nere Schtund – 12 Stange Bier.
Hesch ab und zue - äs Hüngerli
Äs Dürschtli und - äs Riisserli
Die Alt hed Kopfweh - chasch sie nid bitte
Wirsch gschiider Tschugger - bi de Sitte.
Wie d’Geier stürzeds - uf üses Land
(Pirmin) „Steuerfögte, Finanzeintreiber – (alle) s’isch allerhand
s’gid nur eis – gäg die Süüchi
D’Widmer-Schlumpf - als Vogelschüüchi.
D’SVP fürchtet – Usländer i Schare
Freizügigkeit – büti nur G’fahre
Das gseh mer andersch – mer sind nid blind
Händ Freud wenn d’Wiiber - chli freizügig sind
Obama häs Problms – mit siim Bütschee
He goes bankrott fasch - o je o je
Drum wott är Fann – das chline Ferkel
Und lost ab s’Händy – vo de Merkel
Meh Frauequote - da simmer degäge
's gäb nur Puff - mer wüssid's vom Säge
Bim TV gits - au Quote für Manne
Jede Zweit gaht - mit emene Bock i Pfanne
D’Kantonsröt chönd - bim Mittagässe
Wägem Hubi – de Schnaps vergässe
Doch glaubed üs – im Rat herrjeh
Gad ohni Geischt - überhaupt nüd meh.
Bänke : Ruedi Suter und Annelies Stebler - Helgen : Christoph Habeler