Warum händ er mich nid zum Gmeindspräsi gwählt?
Vier lausigi Stimmli zum Andi händ gfählt
Ich weiss, das ich’s nid besser miech,
nur, ich wär wenigstens e glatte Siech.
Si hend i Kantonsrat welle, nid eini, nei grad zwei
D’Fankhuser Wiiber vo de Starkstrompartei
De chönnted’s regiere wie de Cäsar im alte Rom
Die Jung wär starch und die Alt staht unter Strom.
D’Frida, em Jöschtel si Frau, wett halt scho gärn wüsse
Wies mit emne Gmeindrat isch, bim Sex und bim Küsse
Da seit em Doris mit Erfahrig, wirsch es denn scho gseh,
wenn er einisch drin isch, passiert gar nüt meh.
I de Bibliothek staht e grosse, tüüre Kaffeeautomat da
Für es Sicherheitsventil händ’s kei Stutz meh gha
Das hed de Maschine de Nuggi usegjagd, s’isch dumm
Defür chönd d’ Büecher jetzt de Rüggeschwumm.
Z’ Inwil wends s’Schuelhus saniere
D’Schüeler tönd’s i d’Höllgrotte disloziere
Das isch keis Problem für die Chind
Dene tropfts nämli scho lang uf de Grind.
Blickensdörfler, ihr mönd kei Angscht ha vor de Starkstromleitig
Das alles chunnt nid eso gleitig
Vorhär tued üs de Dübi rette
Und sich gmeinsam mit em Gmeindrat an Trax ane chette.
S’Tropicana, s’Bahnhöfli, und au d’Waldmabar
Verschwindet z’Baar no übers Jahr
Fürs Nightlife, sisch trurig aber wahr
Bliibt denn nur no die verruechti, truurig alti Falkebar.
D’ Hingis muess jetzt kei Wösch meh wäsche für es paar Räppli
Sie staht im Tennis scho wieder zoberscht uf em Träppli
Will d’McMahon zum Seckle kei Lizänz überchund
Versuechts sie’s jetzt im Jöchler mit Tennisstund.
De Gmeindspräsi meint: am Mittag vom Minarett
De Muezin z’ghöre wär doch ganz nett.
Er würd sälber im Abigrot, bi Näbel oder Sturm
De Alpsäge verkünde vom Baarer Chileturm.
D’Urner händ mit em Tüüfel e Packt gschlosse
Mit sinere Hilf s’Urseretal dur d’Schöllene erschlosse
Mit Golf wänds jetzt Glanz und Gloria is Tal ufe locke
De Schawiri sölls richte, de Tüüfel dued bocke.
D’Tschingge entsorgid ihre Eternit bim Risi ganz legal
Isch de Asbescht no so giftig, isch doch völlig egal
D’EVZ Spieler händ ja scho Maske a
Jetzt mönd nur no d’Fan wägem Amoniak e Gasmaske ha.
Summervögel im Dezember, de Klimawandel isch da
Muesch kei glismeti Kappe und Händsche meh ha
Schicksch si em Busch, de kümmeret sich nid um die Gschicht
debi blast em e gruusig kalte Wind is Gsicht.
Gschäft, Büro, Hochhüser. Baar wird urban gstaltet
dezue e grosse Bahnhof, wo fascht e kei Zug haltet
Wenn denn nid verchared wirsch i de Rush Hour
Chasch go dinniere uf e Neumühli-Tower.
D’Model mönd e grosse, runde Buse ha
Dänkt de Werder Charli und leid grad sälber Hand a
Bim grabsche und massiere wird er ganz gluschtig
Zwei Wiibli findet das aber gar nid luschtig.
Bänke : Annelies Stebler - Helgen : Brigitte Andermatt