Schnitzelbank 2020

De Corona Virus, sägets im TV

Sig aschteckend, es gäb en Super Gau

Drum lömmer üüs, das müend er wüsse

Nid vo allne Fraue küsse

Mier sind orange, männlich und e chli alt

Anstatt grüen, wiiblich und jünger halt

Schräg i de Landschaft, entgäge de Tendänz

Natürlichi Dummheit, statt künstlichi Intelligänz

Bi de Nationalratswahle sind die Grüene starch im cho

bi de Bundesratswahle isch denn aber d Grüenabfuehr cho

Wenn für dich d Problem z gross sind

gits Babychlappe für unehlichi Chind

doch für d Problem mit mim Bappe

wünsch ich mier Seniorechlappe

Üsi Luftwaffe isch total veraltet

De Luftruum wird nume zu Büroziite verwaltet

Und Patrouille Suisse verfählt ihres Ziel

Flügt statt uf Langebrugg uf Mümliswil

Über 40% Fraue sind gwählt is Parlamänt

Das isch e Steigerig wo isch vehemänt

Üs nimmts wunder wie lang ‘s z’Baar no gaht

Bis e Räbemueter sich wähle laht

D Klimajugend  isch am  demonstriere

Schwänzet d Schuel um luut z protestiere

Wunderets dich, das die mit ihrem Wäse

luut Pisa Studie nümm chönd läse?   

D Wahle hend zeigt, grüen isch  im cho

Z Inwil isch das scho lang eso

D Fröschezunft isch voll im Trend

Wills füfesiebezg Jahr det Grüeni hend

Gmeindrat isch de Wandflueh knapp nid worde

Drum bruucht är en andere Orde

Bim Fröschjubiläum, hergottsakramänt

Isch er als Blickensdörfler OK-Präsident

 Ich bi Inwiler  -  mach mit bi de Frösch

 Bi nümm Gmeindrat  -  nümm i de ZEBA - hösch

  Au us de CVP  -  hani mich uusglogt

  Aber mich het me  -  für OK-Präsi nid gfrogt

De Gabechef Kurt isch gfahre statt gloffe

Am Morge am Drüü vom Esaf chli bsoffe

Zmitzt im Ebel, am neue Dorfplatz

Trifft är en Baum und s’haut en ufe Latz       

D’ Möschteler sind nümm die Jüngschte

Und wettet sii nid die Dümmschte

In Läderhose tüends gärn plagiere

Und hend vergässe d’ Schrinerhalle z’ reserviere.

Wills Trottoir gsperrt isch im Dorf vore

Bin ich uf Gmeind gange, ha en dummi Schnore

Sie hend do gseit: liebe Herr Suter                                   Das sind kei Abschrankige, sondern Elektro-Scooter

Für Trüffel sind Hünd die beste Viicher

Au für Liegeschafte bruuchts en guete Riicher

ich kenn eine mit bsunderem Händli

es isch de Böckel im Räbevater Gwändli

De Chilerat möcht gärn lehre

Wie mer statt Brot cha Land vermehre

Er holt drum clever i de Tat

De Böckel als Bauschef i Chilerat  

.....und noch ein paar sehr aktuelle Bänke

 

De Pfister Geri fragt de Marcel Schmid

Chan ich das entsorge oder nid

Ich rüers furt, das bruucht niemer mee

Das läschtige C  -  vo de CVP

 

D Manuela Weichelt, üsi Grüeni z Bärn

Het e Plan, wär Bundesrätin gärn

Schmeichelt bi de Ritz, so en Scheese

Und verrächnet zum Voruus e Huuffe Speese

 

En neue Virus het d Schwiiz erreicht

Er macht vergässlich, s’het Prominänti preicht

De schwarzi Thiam, de schwuli Lauber

und de Villiger Kaspi weiss nüt vom Crypto Zauber   


Bänke : Ruedi Suter          Helgen : Christoph Habeler

Kommentar schreiben

Kommentare: 0