Schnitzelbank 2022

A de Fasnacht giz nümm  -  Cervelat und Schnitzelbrot

Kei Bratwurscht meh  -  au kei Hot Dog

Nur no Fisch  -  au bim Kebap Brater

De Egli isch jetz  -  Räbevater

Ich bi vieresächzgi  - wird imene Jahr pensioniert

Jetz gahni uf Gmeind  -  ganz ungeniert

Lah mi iiträge  -  als Frau

Und kassiere ab sofort  - die voll AHV

Über hundert Wohnige  -  baut d Korporation

D‘ Lag isch toll  -  d Ussicht en Sensation

Vogelwinkel  -  heisst die neu Adrässe

Fürs Puff a de Altgass  -  würd das besser pässle

Üse Gmeindspräsi  -  gaht mit de Ziit

Uf Insta und Facebook  -  macht är Uftritt

Er tüeg jetz  -  effizient kommuniziere

Und nümm so vill  -  i de Beiz plagiere

Z Mänzige i de Schuel  -  redets über Sex

S Thema isch schwierig  -  und sehr komplex

Statt d Lehreri  -  zum Tüüfel z jage

Hättet’s ja chönne -  d Heggli Spiess go frage

 

Maske aalegge  -  hends i de Migros gschimpft

Hend sie s Zertifikat  -  sind sie g’impft                

Ha de Uswiis zeigt  -  und d Händ no gwäsche

Aber was i ha wölle chauffe  -  hani glatt vergässe

Für d Masoala Halle  -  gahsch i Züri Zoo

Für Leue und Tiger  -  muesch i Zolli z Basel goh

Goofe Gschrei  -  Tröröö und meh

Chasch jetz z Baar  -  im Elefant gseh

Corona isch gfährlich  -  drum gits herti Massnahme

D Gmeind Baar macht da  -  kei Uusnahme

Sie verbüütet Aasammlige  -  das isch klug

Bewilliget d Chilbi  - aber kei Räbeliechtliumzug

Zum Glück machets  -  em Raiffise-Vincenz de Prozess

De hets ja triebe  -  bis zum Exzess

Aber dank ihm  -  das dörf me nid vergässe

Känn ich jetz  -  die beschte Puff-Adrässe

Ich gah is Dorf  -  muess go poschte

Cordonblö, Pizza, Eier  -  s dörf au öppis choschte

Doch ich find nüt  -  es isch de Wahn

nume Tofu, Erbse, Alge  -  alli frässed nur no Vegan

.....und noch ein paar sehr aktuelle Bänke

 

 

Mit de Impfig wärdi schiints  -  en Chip implantiert

Säget Impfgägner  -  Färnstüürig sig garantiert

mier hend’s Moderna  -  ihm Pfizer brunge

Drum han ich in Dur  -  und är in Moll gsunge

Bratwurst und Cervelat  -  derzue no Ländlermusig

Als wird zahlt  -  vom Bund, potztuusig

Das isch doch toll  -  da chasch nid schimpfe

Villicht lönd sich so  -   es paar la impfe

 

Überall hets Antenne  -  sogar ufem Chileturm

5 G strahlet  -  es wird eim fasch sturm

Drum finded mier  - es isch vernünftig

Wenn nume no gilt  -  2 G künftig

I de Schwyz losed mer  -  jetz DAB plus

Fertig mit UKW  -  Digitalisierig chunt in Schuss

Doch z Öschtriich  sinds  -   wiit hinne drii

Det isch erscht - d KURZwälle verbii

Gaht öppis kaputt  -  z Inwil i de Beiz

Bruuchsch kei Versicherig  -  das het sin Reiz

Alles easy  -  es choscht nume zäh Lappe

De Chilerat tuet das  -  scho berappe


Bänke : Ruedi Suter          Zeichnungen : Christoph Habeler

Kommentar schreiben

Kommentare: 0